Денес, платежните картички се ширко прифатено средство за плаќање. Милиони луѓе ги користат картичките за плаќања во продавници или интернет. Злоупотребата на платежните картички како резултат на украдени картички и податоци од картички, денес претставува огромен бизнис за криминалците. Во прилог Ви нудиме неколку едноставни, но корисни совети за поголема безбедност при користењето на Вашите картички.

1. Како да ги заштитите податоците од Вашата картичка;
2. Како до безбедност при трансакции на банкомат;
3. Како безбедно да плаќате со картичка во продавница;
4. Како безбедно да плаќате со картичка преку интернет;
5. Како до поголема сигурност при патување надвор од матичната земја;
6. Како да се заштитите за време на празници.

На Вашата платежна картичка се наоѓаат запишани податоци кои доколку бидат дознаени од трети лица можат да бидат злоупотребени на Ваша штета. Со цел да избегнете злоупотреба на податоците од Вашата картичка потребно е да ги практикувате следните препораки:

• Веднаш по подигањето на картичката од Банката, потпишете се со долготрајно мастило/пенкало на позадината од Вашата дебитна или кредитна картичка.
• Не оставајте го паричникот или ташната на јавни места без надзор.
• Редовно и внимателно проверувајте ги месечните извештаи, дури и во случај да не сте ја користеле картичката во тековниот месец. Доколку се случат определени отстапувања во извештајот, веднаш обратете се кај одговорното лице во Банката.
• Не давајте информации за картичката или ПИН–кодот преку телефон.
• Запомнете го Вашиот личен идентификационен број (ПИН-код).
• ПИН-кодот не запишувајте го заедно со бројот на картичката и/или со други документи.
• Чувајте ја адресата и телефоните од Банката и Процесинг центарот, за да нè известите благовремено за определен проблем или губење/крадење на картичката и со тоа ќе го спречите нејзиното понатамошно користење од неовластени лица.
• Банката и Процесинг центарот се на Ваше располагање, деноноќно, седум дена во неделата.

• Пред внесување на Вашата картичка во банкоматот внимавајте да нема поставено некоj дополнителен уред на отворот за внесување на картичката.
• Уверете се дали тастатурата на која го внесувате ПИН-кодот е оригиналната тастатура на банкоматот.
• Пред внесување на ПИН-кодот на тастатурата на банкоматот уверете се некој да не стои позади Вас.
• Не дозволувајте да стојат во Ваша непосредна близина клиентите кои чекаат.
• Никому не кажувајте го Вашиот ПИН-код, вклучително и на лица кои се претставуваат како службеници на банката или како лица одговорни за одржување на банкоматите.
• Сменете го Вашиот ПИН–код доколку се сомневате дека е пробиен од трето лице.
• Доколку се почувствувате загрозени додека ја извршувате трансакцијата, притиснете го копчето за откажување, земете ја Вашата картичка и напуштете го местото.

Доколку ги следите подолу наведените упатства, значително ќе го намалите ризикот од измама при користење на Вашата картичка за плаќања во продавница.

• Внимателно следете го извршувањето на целата трансакција со Вашата картичка. Веднаш по извршување на трансакцијата, земете си ја картичката и проверете дали вратената картичка е навистина Вашата.
• Секогаш инсистирајте трансакцијата со картичката да се извршува пред Вас - не дозволувајте трговецот да ја однесе картичката во друга просторија или на место каде немате увид како се врши трансакцијата.
• ПИН-кодот секогаш внесувајте го сами на терминалот - никогаш не го кажувајте Вашиот ПИН-код на трговецот за тој да го внесе на терминалот

• Секогаш купувајте на сигурна веб страна – осигурајте се дека после “http” во адресата на веб страната има “s” или во долниот дел на браузер – прозорецот треба да се појавува клуч или катанец како индикатор дека страната е безбедна. Во спротивно, не внесувајте информации за Вашата картичка.
• Бидете сигурни во репутацијата на интернет трговецот и задолжително проверете ја адресата и телефонскиот број на компанијата. Пред да извршите трансакција, проверете на интернет дали има споделени искуства на претходни купувачи за веб страната. Истражувањето за веб страната каде се пазарува се врши пред да ја извршите трансакцијата.
• Веб-страните со добра репутација даваат информација за начинот на кој е заштитена Вашата финансиска трансакција (на пр. автентикација преку Mastercard Identity Check, Visa Secure).
• На веб-страната на која купувате, на јасен и недвосмислен начин треба да е опишана “политиката на сигурност” при плаќањето со картичката.
• Вашата лозинка не ја кажувајте никому – некои on-line продавници бараат да регистрирате корисничко име и лозинка пред да купите некој производ. Исто како што го чувате во тајност ПИН-кодот на Вашата картичка, така чувајте ги во тајност и вашите лозинки.
• Заштитете ги податоците на вашата картичка – податоците од Вашата картичка внесувајте ги само кога плаќате некој производ или услуга. Секогаш пред да ги внесете податоците проверете дали сте на безбедна веб страна.
• Детално проучете ги условите за продажба кои вклучуваат: начин и постапка на доставување на производите/услугите, услови на гаранција, откажување на порачка итн.
• Проверете ја испораката и политиката за враќање на производите – Пред да направите трансакција прочитајте ги правилата за испорака и враќање на производите. Проверете дали може да ги вратите купените производи и кој го сноси трошокот за тоа.
• Чувајте ја коресподенцијата и отпечатете ја целата информација поврзана со трансакцијата што сте ја извршиле. Може да Ви биде потребна подоцна.
• Никогаш и во ниту еден случај на давајте информација и не го внесувајте Вашиот ПИН–код при купувањепреку интернет.
• Не ги оставајте податоците за Вашата картичка за учество во наградни игри, анкети и сл. кои ветуваат награди со голема вредност, бидејќи подоцна можат да доведат до неавторизирани одливи од Вашата картичка.

• Пред да тргнете на пат проверете го рокот на важност на Вашата картичка.
  Доколку рокот на Вашата картичка е истечен, обратете се во Банката за да се информирате за замена на истата.
• Проверете дали имате доволно средства на Вашата сметка и дали сите Ваши уплати се ажурирани.
• Користете ги сефовите во хотелите.
• Кога ја користите Вашата картичка во трговија, проверете ги податоците на белешката.
  Пред да ја потпишете белешката/внесете ПИН-код проверете дали е внесен точен износ кој треба да се наплати.
• Чувајте копија од сите сметко-потврди и споредете ги со извештајот од банка.
• Запомнете го Вашиот ПИН-код.